fbpx

تعليم الكلاب الحمام بدون مدرب

تعليم الكلاب الحمام

بناءً علي طلب معظم المربيين و اسف اني اتاخرت اني اكتب في الموضوع ده.

موضوع الحمام و ازاي اعلم كلبي يعمل حمام في مكان معين و علي نوع اسطح معين سيراميك بقي pads نجيله صناعي، اي حاجه عامه.

تعليم الكلاب الحمام

طبعا بسم الله الرحمن الرحيم كده اكيد انت عارف أن اللي معاك ده كلب! حيوان! مش بيفهم زيينا مهما كان زكي و لماح، بس معلش مش في غريزته خالص اللي ربنا خالقه بيها أنه يكون بيعمل حمام زي ما حضرتك عايز او مكان ما انت عايز، صح؟؟

تمام فعشان اعلم كلبي الصغير ولا حتي الكبير يعمل حمام في مكان معين لازم انا اللي أتدخل بطريقه ما في فعل الحمام بتاعه، بمعني اني لو مديتلوش وقت و مجهود اكييييييد هو مش هيتعلم لوحده.

فا اولا بعد البوست ده انشاء الله مسمعش حضرتك بتقول كلبي عمل حمام غلط عشان لا حضرتك اللي غلطت و سمحت ل كلبك يعمل حمام في المكان اللي ريحه شخصيا ( و ده الطبيعي في غريزته اللي مخلوق بيها و بعد اذنك طبعا )

فلو حضرتك سايب الكلب لوحده من غير توجيه منك و هو عمل حمام و انت رجعت لقيت الحمام حتي لو كان فين اتفضل نضفه و انت ساكت عشان انت اللي غلطت مش هو، اي فعل هتاخده ساعتها مش هيتفهم زي ما حضرتك فاكر خالص و هيخوف الكلب منك و هيعمل مشاكل سلوكية تانيه انت مش قدها لما يكبر معاك.

موضوع انك تجيبه عند الحمام بتاعه و تعد تزعقله أو حتي تلوموا مش فعال بنسبه ١٠٪ حتي و فيه غلطات كتييييير ممكن تحصل منك في المواقف ده تسبب مشاكل تانيه خالص و انت مش واخد بالك، زي انك تندهله ييجي و تعاقبه مثلا هتخليه يخاف و يقلق يجيلك بعد كده.

المهم

في الحالتين إذا كنت بعلم جرو أو كلب نفس المبدأ الفكره بس أن جرو اسهل عشان بيعمل حمام كتيير يوميا فا انا معايا فرص اكتر كل يوم استغلها و اعلم بيها، و في نفس الوقت جسمه لسه مش كامل فا مش بيعرف يمسك نفسه كتير زي كلب معدي سنه مثلا.

المبدأ انك لازم تفهم أن الفتره دي انت معاك طفل صغير لسه بادئ يتحرك فا بيحبي علي أيده و رجله لسه مش بيعرف يمشي، الفتره دي مفيش اب او ام بيسمح ل عينه أنها تغيب عن الطفل و لو ٣ ثواني والله، عشان حالا هيحط حاجه في بقه، حالا هيحط صباعه في الكهربا، أو زي اي طفل مصري اصيل حالا هيضرب سن الطرابيزه ب دماغه 😄😄
فا مش بنسيبه خالص، ولا لحظه و في النوم بنحط جنبه البتاع اللي لو عيط نسمعه ده. وصلت؟

تعليم الكلاب الحمام


نفس المبدأ بقي، الكلب حالا هيعمل حمام في الحته اللي هو عايزها مش اللي انا عايزها.
سبته و ريحت دماغك عشان المسلسل أو مكالمه تليفون حتي لو شغل والله مش هتفرق برضه هو كلب فا ارجوك مترجعش تعاقبه عشان عمل حاجه طبيعيه جدا و انت اللي غلطان انك سبته.

تعليم الجرو الحمام

الموضوع سهل اوي عشان بيعمل ٦٣٨٨٣٦٥٣٥ مره في اليوم ماشاء الله 😄
فا مطلوب منك انك مراقبه شايف بيعمل ايه و بيروح فين عشان ميحطش صباعه في الكهربا 🙄
كل كلب ليه علامات معينه بيعملها قبل الحمام تحس انها زي “امضاء” كده مش بتتغير حتي مع العمر، مختلفه من كل كلب للتاني، فا انت من اعدتك مع كلبك لازم تدرس العلامات دي كويس اوي و تبقي حافظها عشان اول ما تشوفها تبدأ تتصرف.
مواعيد الاكل و تثبيت مواعيد الوجبات مهم جدا جدا جدا
انت دلوقتي خلاص عارف كلبك كويس و عارف العلامات اللي بيعملها قبل ما يعمل حمام دي، اول ما تشوف العلامات دي اعرف ان قدامك ثواني قليله جدا علي ما ياخد القرار و يعمل حمام فعلا.

فموضوع الحمام للكلاب ده ليه حليين:

هخليه يعمل صح و مكافأة
هخليه يعمل غلط و هرخم عليه

لازم الاتنين يكونوا متساويين، عمره ما هيتعلم من عقاب بس ولا مكافأه بس، لازم الاتنين.

لازم ياخد خبره كويسه لما يعمل في المكان الصح
لازم ياخد خبره وحشه لما يعمل في المكان الغلط

هتلاقيه هو بنفسه بدأ يختار المكان الصح اللي فيه خبره حلوه لدرجه انك لو بطلت تروح معاه يعمل حمام هيعمل و يجيلك برضه عشان ياخد المكافأة.

هخليه يعمل حمام صح ازاي بقي؟

و هو بيعمل العلامات هروح نادهله بنبره صوت حنينه و دلع كده زي الأطفال، في ثانيه هيتشغل و يجري عليك تروح انت متحرك علي المكان اللي عايزه يعمل فيه، خلينا نقول جو الحمام أو بلكونه مثلا، هتخش انت و هو اكيد هيخش وراك أفضل اتكلم بنبره صوت دلع ليه مش هيسيبك.
دخلته انتوا الاتنين ارجع انت اقف علي الباب و من غير ما تقفل الباب هتعمل حاجز ب جسمك أن خلاص الكلب جوه و مش هيخرج، و انت أعد عالارض لو عايز عشان دلوقتي الموضوع فيه تحدي شويه، اللي هيزهق الاول هيخسر،
أنزل بقي عالارض هات كرسي اعمل اللي انت عايزه، المهم الكلب ميخرجش، خلي جسمك حاجز و دائما خلي معاك treats اي حاجه صحيه الكلب بيحبها و مش بياكلها يوميا، متقطعه حتت اصغر من عقله صباعك، المكافأة مبدأ مش ربع فرخه.
الجرو مش هياخد وقت طويل و هيعمل، و هو بيعمل و الفعل بيحصل قدامك تديله المكافأة ب هدووء و حركات بطيئه شويه عشان متوتروش و نبره صوت حلوه good booooy أو مهما كان اللي بتقولوا شاطر اي حاجه، و بتخرجوا انتوا الاتنين خلاص مبروك انت كسبت المره دي و مطلوب منك تعاقب كام مره بس في الأماكن اللي هو حابب يعمل فيها دي عشان بس ياخد فيها خبره وحشه و يبطل يختارها حتي و انت مش موجود.
و بعد كده مكافأاااات كتييييير اللي هو ٣ ٤ ايام ورا بعض بيعمل صح و تديله مكافأه كل المرات اللي عملها اتدخلت انت فيها و خليتها صح و مكافأة، ساعتها بس اليوم الخامس هتلاقي دخل اختار المكان الصح بنفسه.

هخليه يعمل غلط و اعاقبه ازاي بقي؟؟؟

زي ما قلنا انا عيني علي الكلب و شايفه بيعمل العلامات اهو، هسيبه لغايه ما ياخد القرار و يبدأ اول ما يبدأ هقول لأاااااااه 😄
مش بهزر هتكلم ب نبره صوت رخمه هخضه من الاخر دبدبه عالارض ممكن تسقيفه من الاخر الغرض اني اوتره و مخليهوش يكمل مرتاح، لازم تبقي خبره وحشه في المكان ده. و لازم لازم و هو بيعمل مش بعدها ب شويه ونبي.. مفيش ضرب مفيش ضرب مفيش ضرب مفيش لمس اصلا مفيش اشيله و اجري بيه عالمكان الصح ، كل الحاجات دي بتعمل مشاكل بعدين لما يكبروا و الناس بتمشيهم و هما مش فاهمين أن برضه الناس اللي غلطانه…

*نصيحه دائما استخدم كلمه معينه متغيرهاش و هو بيعمل حمام زي ( يلا حمام ) ( اعمل حمام ) اي حاجه عشان لو عملت اللي بقولوه ده هتوصل لدرجه انك في أي حته بتقولوا روح اعمل حمام بيروح يعمل حمام ⁦💪🏼⁩

والله لو طبقنا الكلام ده حرفيا مش مره و مره مش ١٠ مرات و مرتين لا، لو طبقنا الكلام ده حرفيا هتشوف نتيجه تبهرك في اقل من اسبوع.
بس انت بس بطل تغلط و دائما اكسب تحدي الصبر انك تستناه يعمل، لو دخل المكان و نام اصبر، طيب ده بيلعب، اصبر، اي حاجه، اصبر. اللحظه اللي هتيأس و تقول لا شكله مش عايز يعمل و تخرجوا من المكان هتبص وراك تلاقيه بيعمل، عشان اصلا هو أعد جوه ماسك نفسه مستني يخرج يعمل بره، المطلوب يبقي مش قادر يمسك نفسه خلاص فا يعمل فا ياخد مكافأة و هيييه  و كده.

تعليم الكلب الكبير الحمام

نفس الكلام بالظبط بس هتصبر بال ٧ ٨ ٩ ١٠ ساعات 🙃🙃

عشان كده ياريت تبدأ بدري و يارب نبطل ندي نصائح للناس المربيه جديد أنهم يصبروا لما يكبر دي عشان والله انتوا سبب كلاب كتييييير تمشي من بيوتها….

لو في موقف انك جالك كلب كبير و لازم تعلمه طبعا، هتبدأ تشتغل علي المثانه بتاعته، ثبت مواعيد الاكل اجباري مفيش هزار، ركز مع الكلب اوي لما تحس أنه عايز او بيعمل علامات خده و انزل أو روح عالمكان اللي عايزه يعمل فيه، و اصبر اصبر اصبر، زهقت عادي ارجع تاني بس تركيزك اكتر معاه عشان انت عارف أنه عايز يعمل، هوبا بيعمل العلامات، تعالي اقولك و انزل تاني، اصبر اصبر اصبر، زهقت عادي ارجع تاني بتركيز اعلي بكتييييير معاه، و علي كده.

اللي بتعمله انك بتخليه يحس أنه هييه يلا هعمل حمام، بعد كده ايه ده لا انا مش هعمل هنا فا يمسك نفسه، يطلع تاني هييه هعمل اهو ، تلحقه و تنزل تاني، المثانه مش هتقدر تمسك نفسها كتير بعد ما انت عمال تشغلها و تعطلها كده كل شويه فا sooner or later هيعمل و لازم تكسب، الميزه الوحيده في الكلاب الكبيره أن اول مره تنجح فيها بتكون الاصعب و بعد كده اسهل، الجرو ما بيبقاش فااااهم ايتها حاجه.

موضوع انك عايزه يعمل علي حاجه معينه pads , نجيله صناعي أو حتي جرائد.

لازم تغطي الأرض كلها في المكان اللي عايزه يعمل فيه، في الاول كلها عشان تجبره يبقي هو ده الملمس و الريحه اللي بيحسها كل مره بيعمل حمام، تدريجيا بتقلل اللي حاطه علي الارض واحده واحده لغايه ما يبقي بيعمل عليه برضه، جيت تقلل لقيته بيعمل غلط غطي تاني لغايه ما يتعود علي الملمس اكتر.

الخلاصة:

• استخدمت كلمه عقاب بس عشان الناس كلها تفهم.
• مفيش ضرب مفيش ضرب مفيش ضرب
• انت اللي غلطان مش الكلب
• لو مقعدتش عملتها بنفسك متستنهاش تحصل لوحدها
• مفيش حاجه اسمها كورس تويلت، المدرب مش هيبات عندك يعلم كلبك يعمل فين، و لو خده منك شهر تعليم برضه لازم توجهوا تاني لما يرجع بيتك.
• اوعي فيشه الكهربا

يارب الناس تستفيد و ارجوكم بلاش نصيحه لسه صغير لما يكبر عشان غلط في معظم الحاجات مش بس الحمام.

شكرا ل facebook.com/unitedbarkdom

https://www.facebook.com/unitedbarkdom/photos/a.100866504724054/166481811495856/?type=3&eid=ARDCj5eKJ0U2eB4D8JaV7ffHvYK8R-zisx2SAzIn4_ksuOV_8AtZUgooBe_Ada8WQ7ZsppMBJo9S5t51&ifg=1

أترك تعليقك و شارك برأيك